ORLOFSHÚS PÓSTMANNAFÉLAGSINS

Orlofshús sem félagsmenn Póstmannafélagsins hafa kost á að leigja eru á þremur stöðum á landinu; í Munaðarnesi, á Eiðum og á Illugastöðum. Félagið á íbúð í Reykjavík og á Akureyri.

Munaðarnes er í miðjum Borgarfirði í fallegu umhverfi með útsýni til Baulu, Skarðsheiðar, Langjökuls, Eiríksjökuls og fleira. Fallegar gönguleiðir eru frá bústöðum að Paradísarlaut, Laxfoss og Glanna. Sundstaðir og hægt að kaupa veiðileyfi í vötn í nágrenninu t.d. Hólmavatn, Langavatn og Hreðavatn. Þá er góður golfvöllur að Hamri skammt frá Borgarnesi og annar golfvöllur Glanni er við Bifröst. Dvalargestir í Munaðarnesi fá afslátt af vallargjöldum á golfvöllinn Glanna. Í Borgarfirði er auk náttúrufegurðar mikill fjöldi sögustaða til dæmis; Reykholt, Borg á Mýrum, Straumfjörður, Húsafell, Surtshellir og Hraunfossar.
Póstmannafélagið hefur til umráða fjögur hús í Munaðarnesi; eitt hús með þremur svefnherbergjum, tvö hús með tveimur svefnherbergjum og eitt hús með einu svefnherbergi. Húsin eru með öllum nauðsynlegum búnaði og við þau er heitur pottur. Nánar um búnað og verð.

Eiðum á Héraði um tuttugu kílómetrum frá Egilsstöðum eru tvö hús á vegum Póstmannafélagsins þau eru bæði með þremur svefnherbergjum og búnaður svipaður og í Munaðarnesi. Þar eru ekki heitir pottar en bátur er til afnota fyrir dvalargesti svo möguleiki er til veiða í Eiðavatni. Eiðar eru miðsvæðis á Austurlandi og því miklir möguleikar til að skoða sig um á svæðinu frá fjalli til fjöru. 2012 voru miklar endurbætur á húsunum á Eiðum bæði innanhús og utanhúss. Húsin leigjast yfir sumartímann og fram á haust. Húsin eru opnuð fyrir páskaleigu ef veður og færð leyfa. 

Orlofshúsin í Munaðarnesi og á Eiðum eru innan orlofsbyggða BSRB. 2009 tók gildi nýtt rekstrarform á orlofsbyggðunum, með því hefur félagið aukinn umráðarétt og ábyrgð á húsunum. Nú sjá orlofsnefnd og skrifstofa Póstmannafélagsins um útleigu á húsunum allt árið og því geta þeir sem hafa áhuga á að dvelja í húsunum yfir veturinn haft samband við skrifstofu PFÍ vegna leigu.

Í orlofsbyggðinni að Illugastöðum í Fnjóskadal á Póstmannafélagið orlofshús sem er 40km austan Akureyrar. Þar er gott að dvelja og heimsækja athyglisverða staði í nágrenni. Vaglaskógur er í 10km fjarlægð, Húsavík 75km, Hljóðaklettar 100km og Ásbyrgi 143km. Stutt er að Goðafossi og Aldeyjarfossi í Skjálfandafljóti. Margir skógar eru í Fnjóskadal.  Skemmtilegar gönguferðir t.d. yfir Bíldsárskarð, upp á Hálsahnjúk og yfir Gönguskarð.  Orlofshúsið að Illugastöðum er með tveimur svefnherbergjum og gistiaðstöðu fyrir 6 manns. Á veröndinni er heitur pottur auk þess sem sundlaug er á staðnum. Nánar um búnað og verð

Tjarnarlundur 2e á Akureyri er 3ja herbergja rúmgóð, velbúin íbúð. Gisting er fyrir 6 og aukadýnur. Sængur og koddar eru fyrir átta auk líns. Nánar um búnað og verð

Stakkholt 2B í Reykjavík er 3ja herbergja velbúin íbúð með svefnstæði fyrir 4 og aukadýnur. Sængur og koddar eru fyrir átta. Rúmföt fylgja ekki. Nánar um búnað og verð

FLEIRA Í BOÐI Í SUMAR

Á skrifstofu PFÍ er hægt að kaupa;
Miða í Hvalfjarðargöng kr. 635kr. Útilegukortið 2018 kostar 14.000kr og Veiðikortið 2018 sem kostar 4.000kr. 

Gistimiða fyrir Fosshótel sem eru seldir allt árið kr. 10.000  2018 og Edduhótel gistimiðar sumar 2018 kr. 10.000. 

Hótel Edda er með 11 hótel hringinn í kringum landið og gildir miðinn á þeim öllum. Hver miði fyrir sumarið 2018 gildir fyrir tvo í gistingu í tveggja manna herbergi með handlaug eina nótt. Hægt er að borga viðbótargjald fyrir herbergi með baði. 

Fosshótel er með fjölda hótela hringinn í kringum landið og eru mörg þeirra staðsett við náttúruperlur landsins. Gistimiði 2018 gildir fyrir standard tveggja manna herbergi með morgunverði.  Í maí, júní, júlí, ágúst og september skal greiða 2 gistimiða fyrir 1 nótt á öllum hótelum. Í Reykjavík eru Grand Hótel Reykjavík, Hótel Reykjavík Centrum, Fosshótel Reykjavík, Fosshótel Rauðará, Fosshótel Barón og Fosshótel Lind. Á Fosshótel Reykjavík, Hótel Reykjavík Centrum og Grand Hótel Reykjavík þarf að greiða 6.000kr. aukalega fyrir hverja nótt við innritun. Félagsmaður PFÍ getur keypt 2 gistimiða. 

Allar upplýsingar um staðsetningu og verð eru á heimasíðu hótelanna www.fosshotel.is og www.hoteledda.is. Félagsmenn sjá sjálfir um bókanir og við pöntun þarf að taka fram að greitt sé með gistimiða.

Icelandair flugmiða (takmarkaður fjöldi til) kr. 20.000 verðgildi miðans er 25.000.